نئی دہلی ،31جنوری:(ہندوستان اردو ٹائمز) ہنڈن برگ رپورٹ کے سامنے آنے کے بعد سے گوتم اڈانی کی مشکلات کم ہونے کا نام نہیں لے رہی ہیں۔ اڈانی کے لیے ہر طرف سے بری خبریں سامنے آ رہی ہیں۔ ایک طرف اس رپورٹ کے آنے کے بعد اڈانی کے حصص زمیں بوس ہو گئے ہیں۔
وہیں دوسری طرف، اڈانی دنیا کے ٹاپ 10 امیر ترین لوگوں کی فہرست سے بھی باہر ہو گئے ہیں۔ اڈانی اب 11ویں نمبر پر چلے گئے ہیں۔بلومبرگ بلینیئرز انڈیکس کے مطابق، گوتم اڈانی کی مجموعی مالیت صرف 84.4 ارب ڈالر رہ گئی ہے۔ اس کے ساتھ ہی ریلائنس انڈسٹریز کے چیئرمین مکیش امبانی اب دنیا کے امیر ترین لوگوں کی فہرست میں 12ویں نمبر پر پہنچ گئے ہیں۔ ان کی کل مالیت 82.2 ارب ڈالر ہے۔گوتم اڈانی سال 2022 میں زیادہ سے زیادہ دولت کمانے کے لیے سرخیوں میں تھے۔ نیا سال شروع ہوتے ہی اڈانی کے لیے بری خبریں سامنے آئی ہے۔
جنوری کے مہینے میں سب سے زیادہ جائیداد کھونے کے معاملے میں اڈانی کا نام سب سے اوپر آیا ہے۔ اڈانی کو صرف ایک مہینے میں 36.1 ارب ڈالر کا نقصان ہوا ہے۔اڈانی کی کمپنیوں کے حوالے سے ہنڈن برگ کی رپورٹ کے منفی آنے کے بعد ان کی مشکلات بڑھ گئی ہیں۔
اڈانی گروپ کی اسٹاک مارکیٹ میں درج سات کمپنیوں کے حصص میں زبردست گراوٹ کی وجہ سے صرف تین دنوں میں اڈانی گروپ کی کمپنیوں کی کل مارکیٹ کیپ میں 5.5 لاکھ کروڑ روپے کی کمی واقع ہوئی ہے۔ اڈانی ٹوٹل گیس اور اڈانی گرین انرجی کے حصص میں پچھلے چار دنوں میں 20 فیصد سے زیادہ کی کمی درج کی گئی ہے۔ اس کے ساتھ ہی اڈانی پورٹس سے لے کر اڈانی ولمار تک اسٹاک مارکیٹ میں درج اڈانی کمپنیوں کے حصص بری طرح ٹوٹ چکے ہیں۔ جبکہ حصص میں زوال اب بھی جاری ہے۔
