قومی

گجرات کے مختلف اضلاع میں موسلا دھار بارش،علاقوں میں سیلاب جیسی صورتحال،احمد آباد میں اسکول،کالج بند

گجرات کے کئی اضلاع میں گزشتہ چند دنوں سے جاری موسلادھار بارش کے باعث سیلاب کی صورتحال پیدا ہوگئی ہے۔ ولساڈ، نوساری، تاپی سمیت کئی دیگر اضلاع میں شدید بارش ہوئی ہے۔ گجرات کے کھیڑا ضلع کے ناڈیاڈ کے مختلف علاقوں میں سیلاب جیسی صورتحال پیدا ہوگئی۔ احمد آباد، پالڈی، بوداک دیو، عثمان پورہ اور جودھ پور میں بھی مسلسل بارش کے ساتھ پانی جمع دیکھا گیا۔ احمد آباد میں گزشتہ تین دنوں میں سیزن کی 30 فیصد بارش ہوئی ہے۔

انڈیا ٹی وی کی ایک خبر میں بتایا گیا ہے کہ شدید بارشوں کے درمیان، گجرات کے ڈیزاسٹر مینجمنٹ کے وزیر راجندر ترویدی نے کہا کہ ریاستی حکومت نے نشیبی علاقوں میں رہنے والے لوگوں کو محفوظ مقامات پر منتقل کرنے کے انتظامات کیے ہیں۔ موجودہ صورتحال کے پیش نظر احمد آباد میونسپل کارپوریشن نے پیر کو شہر میں اسکول اور کالج بند رکھنے کا فیصلہ کیا ہے۔ چھوٹا ادے پور میں اتوار کو مسلسل بارش کی وجہ سے ایک پل کا ایک حصہ بھی گر گیا ہے۔

جبکہ ہندوستان ٹائمز کی خبر میں کہا گیا ہے کہ سیلاب کے درمیان ریسکیو آپریشن جاری ہے اور اب تک تقریباً 1500 افراد کو محفوظ مقامات پر منتقل کیا جا چکا ہے۔ گجرات کے نوساری ضلع میں شدید بارش کی وجہ سے ندیوں کی سطح آب میں اضافہ ہوا ہے۔ نوساری ضلع میں کاویری اور امبیکا ندیاں خطرے کے نشان سے اوپر بہہ رہی ہیں۔ ضلع کلکٹر امت پرکاش یادو نے کہا کہ نشیبی علاقوں سے لوگوں کو نکالا جا رہا ہے۔ اب تک 300 سے زیادہ لوگوں کو محفوظ مقامات پر منتقل کیا جا چکا ہے اور نیشنل ڈیزاسٹر رسپانس فورس (این ڈی آر ایف) کی ایک کمپنی کی مدد سے آپریشن جاری ہے۔ این ڈی آر ایف اور مقامی انتظامیہ کی کئی ٹیموں نے سیلاب سے متاثرہ علاقوں میں بچاؤ اور راحت کا کام کیا۔

ہماری یوٹیوب ویڈیوز

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button