پٹنہ سول کورٹ میں جمعہ کے روز بم دھماکہ سے ہر طرف افرا تفری کا ماحول دیکھنے کو ملا۔ اس بم دھماکہ کی وجہ سے عدالتی احاطہ میں دہشت کا ماحول قائم ہو گیا۔
بتایا جاتا ہے کہ اگم کنواں تھانہ سے سَب انسپکٹر دھماکہ خیز مادہ لے کر عدالت پہنچے تھے اور کورٹ احاطہ میں اس کو ایک ٹیبل پر رکھ کر کاغذی خانہ پری کر رہے تھے تبھی اچانک دھماکہ ہو گیا۔ اس دھماکہ سے عدالت میں چیخ و پکار کا ایک عالم دیکھنے کو ملا۔ بتایا جاتا ہے کہ دھماکہ میں سَب انسپکٹر کو بھی معمولی چوٹ آئی ہے۔ اس دھماکے کی خبر ملنے کے فوراً بعد پولیس کے اعلیٰ افسرا سول کورٹ پہنچے اور معاملے کی تفتیش شروع کر دی۔ پیربہور تھانے کی پولیس اب بھی موقع پر موجود ہے۔
Bihar | A low-intensity blast reported in the civil court of Patna, one constable reportedly injured. Details awaited.
— ANI (@ANI) July 1, 2022
میڈیا رپورٹس کے مطابق کدم کنواں تھانے کے سَب انسپکٹر پٹنہ سول کورٹ میں ثبوت کے طور پر ایک بم لائے تھے۔ یہ بم گزشتہ دنوں شہر کے پٹیل ہاسٹل سے برآمد کیا گیا تھا، جسے عدالت میں بطور ثبوت پیش کیا جانا تھا۔ عدالت میں سماعت سے پہلے سَب انسپکٹر دھماکہ خیز مواد کو ایک ٹیبل پر رکھ کر جب کچھ کاغذی کارروائی کر رہے تھے تبھی اچانک ٹیبل پر رکھا بم پھٹ گیا۔ اس واقعہ میں زخمی پولیس افسر کو علاج کے لیے پی ایم سی ایچ میں داخل کرایا گیا ہے۔ سَب انسپکٹر کا نام سدھیر کمار بتایا جا رہا ہے۔
