پبلک گرلز انٹر کالج کے انٹر میڈیٹ وہائی اسکول کے نتائج انتہائی شاندار
بورڈ امتحانات کے شاندار نتائج کالج کے بانی مولانا حسیب صدیقی ؒ کو سچا خراج عقیدت۔فہیم صدیقی
دیوبند، 19؍ جون (رضوان سلمانی) دیوبند کے مشہور ومعروف تعلیم نسواں کے عصری تعلیمی ادارہ’’پبلک گرلز انٹر کالج دیوبند‘‘نے اپنی گذشتہ روایت کو برقرار رکھتے ہوئے یوپی بورڈ کے انٹر میڈیٹ اور ہائی اسکول کے نتائج کو 100%فیصد رکھنے میں اس سال بھی کامیابی حاصل کی ہے ۔اس سال بھی ہائی اسکول اور انٹر میڈیٹ کے نتائج صد فیصد رہے انٹر میڈیٹ کی طالبہ میمونہ 81.8%اور ہائی اسکول کی طالبہ روحی 82.33%نمبرات حاصل کرکے اپنے کالج کی ٹاپر رہیں۔
اسی طرح انٹر میڈیٹ کی طالبہ علوینا 81.2%نمبرات حاصل کرکے کالج میں دوسرا مقام حاصل کرنے میں کامیاب رہیں۔اس سال سائنس مضامین کے ساتھ انٹر میڈیٹ کے امتحان میں شریک ہونے والی طالبات میں ادیبہ ریاست نے شاندار تعلیمی مظاہرہ کرتے ہوئے تین مضامین میں ڈسٹنکشن کے ساتھ امتیازی نمبرات سے کامیابی حاصل کی ہے ۔پبلک گرلز انٹر کالج سے اس سال ہائی اسکول وانٹر میڈیٹ کے بورڈ امتحان میں مجموعی طورسے 67طالبات نے شرکت کی تھی جن میں انٹر میڈیٹ کی 26؍طالبات اور ہائی اسکول کی41؍طالبات شریک امتحان ہوئیں ۔تمام طالبات نے امتیازی وفرسٹ ڈویژن سے کامیابی حاصل کی ہے اکثر طالبات اپنے تمام مضامین میں ڈسٹنکشن حاصل کرکے امتیازی پوزیشن سے کامیاب ہوئیں ہیں۔ان کے علاوہ یمنی،صہیمہ،یمنی خاتون،مریم ممتاز،ذکیہ،سعدیہ،ثناء،نبیہ،حمیرہ،رونق،ادیبہ ریاست،فلک عظیم،ثانیہ،ثمینہ اور عائشہ نے بہترین کار کردگی کا مظاہرہ کرتے ہوئے امتیازی پوزیشن سے کامیابی حاصل کرکے اپنے کالج ،اساتذہ اور والدین کا نام روشن کیا ہے ۔
پبلک گرلز انٹر کالج کے ایچ او ڈی فہیم صدیقی نے کہا کہ ادارہ کے بانی مولانا حسیب صدیقی مرحوم جس اعلیٰ ومعیاری تعلیم کے لئے اپنی پوری زندگی جد وجہد کرتے رہے انٹر کالج کے یہ نتائج انہیں سچی خراج عقیدت ہے ۔کالج کی پرنسپل صفیہ گوھر ،سنیئر ٹیچرز شبانہ ذکی اور روبینہ شہزاد نے بتایا کہ انٹر میڈیٹ اور ہائی اسکول کی متعدد طالبات نے اپنے تمام مضامین میں ڈسٹنکشن کے ساتھ کامیابی حاصل کی ہے۔انہوں نے تمام طالبات اور ان کے والدین کو اس شاندار کامیابی پر مبارکباد دی ۔
پبلک گرلز انٹر کالج کے منیجر سہیل صدیقی ،صبا حسیب صدیقی اور دیگر منتظمین نے تمام طالبات اوران کے والدین وسرپرستوں کو مبارکباد دیتے ہوئے تابناک مستقبل کے لئے دعائیں دیں۔وہیں دوسری جانب دیوبند کے قدیم عصری تعلیمی ادارے اسلامیہ انٹر کالج کے طلبہ وطالبات نے بھی بورڈ امتحانات میں شاندار کار کردگی کا مظاہرہ کیا ہے ۔ادارہ کے منیجر رضوان الحق صدیقی ایڈوکیٹ نے تمام کامیاب طلبہ وطالبات کو مبارکباد دی ۔ادارہ کے پرنسپل ارشد زماں نے بتایا کہ اس سال ہائی اسکول کا رزلٹ 95.4%اور انٹر میڈیٹ کا رز لٹ99%رہا ہے ۔دیوبند کے قدیم عصری تعلیمی ادارہ ایچ اے وی انٹر کالج کی انٹر میڈیٹ کی طالبہ اپوروا نے 84%نمبرات حاصل کرکے دیوبند میں پہلا مقام حاصل کیا۔
