نئی دہلی ،28ستمبر ( ہندوستان اردو ٹائمز ) آرایس ایس کی ذیلی شاخ مسلم راشٹریہ منچ نے پیپلز فرنٹ آف انڈیا پر پابندی کی پرزور حمایت کرتے ہوئے حکومت کے اس اقدام کو قابل تحسین قرار دیا ہے، خیال رہے کہ آر ایس ایس کو زمینی سطح پر پاپولر فرنٹ آف انڈیا سے سخت ٹکر مل رہی تھی۔
پریس ریلیز کے مطابق منچ کے میڈیا انچارج شاہد سعید نے کہا ہے کہ قومی اتحاد اور یکجہتی کو یقینی بناتے ہوئے ایک اور سرجیکل اسٹرائیک کرنے پر وزیر اعظم اور وزیر داخلہ کو مسلم راشٹریہ منچ، بھارت فرسٹ اور ہندوستان فرسٹ ہندوستانی بیسٹ کی طرف سے دلی مبارکباد اور شکریہ پیش کیا ۔آر ایس ایس کے سینئر لیڈر اندریش کمار مسلم راشٹریہ منچ اور اس کے مرکزی سرپرست نے پہلے ہی پی ایف آئی پر پابندی کا مطالبہ کیا تھا۔
فورم کا ماننا ہے کہ یہ ایک بہت اہم فیصلہ ہے جسے اگر یو پی اے حکومت نے لیا ہوتا تو آج پی ایف آئی کی وجہ سے ملک کو اتنا نقصان نہ اٹھانا پڑتا۔وزیر اعظم نریندر مودی اور وزیر داخلہ امیت شاہ کو مبارکباد دیتے ہوئے منچ نے درخواست کی ہے کہ آپ ہمیشہ قومی سلامتی اور سالمیت کے نگران رہیں، چوکس رہیں اور اس بات کو یقینی بنائیں کہ پی ایف آئی مختلف ناموں اور بینرز کے تحت اپنی دہشت گردانہ سرگرمیاں جاری نہ رکھے۔
قومی کنوینر محمد افضل اور اسلام عباس کا خیال ہے کہ پی ایف آئی جیسی دہشت گردانہ اور تخریبی سرگرمیوں کو ہمیشہ کے لیے کچل دیا جانا چاہیے ،جو معاشرے میں زہر کی طرح ہیں۔ منچ نے اس بات پر بھی زور دیا کہ پی ایف آئی 2006 میں اپنے وجود کے بعد سے ممنوعہ تنظیم سیمی کے کام کو فروغ دے رہی ہے، وقتاً فوقتاً سیکورٹی ایجنسیوں کو ملک دشمن ہونے کے ثبوت ملتے رہتے ہیں۔ اور آخر کار آج ملک کے لیے ایک بڑا دن ہے جب اس شدت پسند تنظیم پر پابندی عائد کی گئی ہے۔
