نئی دہلی ،9ستمبر (ہندوستان اردو ٹائمز) حالیہ دنوں میں مدارس کے تعلق سے یہ تاثر دیا جا رہا ہے کہ یہاں پڑھنے والے بچے یا تو زندگی کی دوڑ میں پیچھے رہ جاتے ہیں یا پھر مبینہ طور پر دہشت گرد بن جاتے ہیں۔ ایسے میں این ای ای ٹی 2022 امتحان کے نتائج نے سب کو حیران کر دیا ہے۔خیا لر ہے کہ اس بار پورے ہندوستان سے تقریباً 18 لاکھ بچوںنے این ای ای ٹی کے امتحان میں شرکت کی تھی۔ ان میں سے اکثر مدارس سے پاس آؤٹ طلباء بھی ہیں۔ ان میں سے کئی نے اس امتحان میں شاندار کامیابی حاصل کی۔ ایسے طلباء میں شاہین کالج کے 10 حفاظ شامل ہیں جو ریاست کرناٹک کے ضلع بیدر میں واقع مدارس کے فارغین ہیں۔
امتحان میں ان کے رینک کو دیکھ کر اندازہ لگایا جا رہا ہے کہ ایم بی بی ایس کی سرکاری سیٹیں دستیاب ہوں گی۔ دس میں سے چار طلبہ نے 600 سے زیادہ نمبر حاصل کیے ہیں۔ تاہم سینکڑوں طلبہ میں سے یہ حفاظ شاہین گروپ کے لیے قابل فخر ہیں ۔ ادارے کے لوگ بتاتے ہیں کہ یہ طلبہ کبھی اسکول نہیں گئے۔ انہیں عربی اور اردو کے علاوہ کسی اور زبان یا مضامین کا علم نہیں تھا۔ مدرسہ سے فراغت کے بعد شاہین گروپ کے اکیڈمک انٹینسیو کیئر یونٹ نے ان کی بہترین کارکردگی اور ممتاز میڈیکل کالجوں میں مفت سرکاری نشستیں حاصل کرنے میں مدد کی۔ انہیں شاہین گروپ کی طرف سے مفت کوچنگ دی گئی۔ جہاں سائنس اور ریاضی انہیں پڑھایا گیا۔ خیال رہے کہ یہ ادارہ ایک منفرد لیکن کامیاب ماڈل کے ذریعے حفاظ طلبا کو طب اور دیگر پیشوں میں مقابلہ جاتی امتحانات کے لیے تیار کرتا ہے۔
این ای ای ٹی میں ہر سال کی طرح اس سال بھی کالج کا بہترین نتیجہ آیا ہے۔ 450 سے زائد طلبا کو سرکاری ایم بی بی ایس کی نشستیں ملنے کی امید ہے۔ ڈاکٹر عبدالقادر شاہین گروپ آف انسٹی ٹیوشنز کے چیئرمین ہیں۔انہوں نے بتایا کہ مدرسہ میں حفظ کی تعلیم مکمل کرنے والے 12 طلباء نے ہمارے ادارے میں بنیادی کورس پڑھا۔پی یو سی مکمل کیا اور این ای ای ٹیمیں اچھی کارکردگی کا مظاہرہ کیا۔ انہوں نے کہا کہ کامیابی حاصل کرنے والوں میں بڑی تعداد میں ایسے طلباہیں جنہوں نے سرکاری اسکولوں، کنڑ میڈیم اور دیہی علاقوں میں تعلیم حاصل کی ہے۔
مدرسہ کے فارغ التحصیل محمد علی اقبال نے کہا کہ میں بہت خوش ہوں کیونکہ میں نےNEET میں 680 نمبر حاصل کیے ہیں۔ علی اقبال حافظ قرآن بھی ہیں۔ انہوں نے شاہین کالج میں بھی ٹاپ کیا تھا۔ انہوں نے مزید کہا کہ ان کا میڈیکل کورس کا خواب شاہین کے اکیڈمک انٹینسیو کیئر یونٹ فار ڈراپ آؤٹ کی وجہ سے پورا ہوا ہے۔
