مسابقے طلباء کی خوابیدہ صلاحیت کو بیدار اور آگے بڑھنے کا جذبہ پیدا کرتے ہیں
معہد عائشہ الصدیقہ قاسم العلوم للبنات میں منعقدہ پروگرام سے مولانا ندیم الواجدی کا اظہار خیال
دیوبند 27؍جنوری (رضوان سلمانی) مسابقے طلباء کی خوابیدہ صلاحیت کو بیدار کرتے ہیں اور ان کے اندر آگے بڑھنے کا جذبہ پیدا کرتے ہیں، اس زمانہ میں جب ہر میدان میں کمپٹیشن ہے طلباء کی تعلیمی صلاحیت کو بیدار کرنے کے لئے مسابقہ جات کا انعقاد کرنا بہت ضروری ہے۔ ان خیالات کا اظہار طالبات کے مشہور ادارہ معہد عائشہ الصدیقہ قاسم العلوم للبنات دیوبند کی مرکزی انجمن ’’بزم عائشہ ‘‘کی جانب سے منعقدہ مسابقہ حفظ الحدیث اور جلسہ تقسیم انعامات کے موقع معروف صاحب قلم اور ماہنامہ ترجمان دیوبند کے مدیر اعلیٰ مولانا ندیم الواجدی ناظم معہد عائشہ الصدیقہ قاسم العلوم للبنات دیوبند نے کیا۔ انہوں نے کہا کہ اس زمانے میں احادیث کو زبانی یاد کرنے کا سلسلہ ختم ہوگیا ہے آپ کا یہ مسابقہ اس حوالے سے خوش آئند ہے کہ طالبات نے 200احادیث ز بانی یاد کرلیں اور ان کے معانی اور مفاہیم کو بھی بہت حد تک سمجھ لیا ،
انہوں نے کہا کہ نبی کریم ﷺ نے چالیس احادیث یاد کرنے والے کے لئے بشارت کا اعلان کیا ہے جس کو علامہ نووی نے اپنے کتاب اربعین میں مختلف طرق سے ذکر کیا ہے قابل مبارکباد ہیں وہ طالبات جنہوں نے اس مسابقے میں حصہ لیا اور مختلف مراحل سے گزر کر آخری مرحلے تک پہنچیں ۔انہوں نے کہا کہ آپ کی ذمہ داری ہے کہ ان احادیث کو یاد رکھیں اور اس کا آسان طریقہ ہے کہ آپ ان احادیث کو عمل میں لے آئیں اور وقتاً فوقتاً ان کو دہراتے بھی رہیں ۔انہوں نے کہا کہ مجھے امید ہے کہ جو طالبات آخری مراحل تک نہیں پہنچ سکیں یا وہ انعامات کی مستحق نہیں ہوئیں وہ مایوس نہیں ہوں گی بلکہ آئندہ مزید محنت اور حوصلہ کے ساتھ وہ اس طرح کے مسابقوں میں حصہ لیں گی اور کامیابی حاصل کریں گی ۔اس موقع پر مولانا ندیم الواجدی نے تکرار ومطالعہ ،اسباق کی پابندی کی نصیحت کرتے ہوئے کہا کہ کسی بھی طالب علم کی کامیابی کی ضامن یہی چیزیں ہیں ہمیں ان کو لازم پکڑ لینا چاہئے ۔
قبل ازیں پروگرام کا آغاز صفیہ سلیم کی تلاوت کلام اللہ اور کلثوم مشرف کے نعتیہ کلام سے ہوا ۔ پروگرام سے خطاب کرتے ہوئے معہد کی قدیم فاضلہ شیبا اعجاز دیوبندی نے کہا کہ ہمیں بہت خوشی ہے کہ مادر علمی روز بروز ترقیات کی منازل طے کررہا ہے اور آج مسابقہ حفظ الحدیث کے اس پروگرام میں شرکت کرکے ہمیں محسوس ہورہا ہے کہ اگر اس طرح کے سلسلے چلتے رہے تو انشاء اللہ طالبات کی صلاحیتوں میں روز بروز نکھار آتا جائے گا ۔تھانوی اسلامک اکیڈمی کی ڈائریکٹر حلیمہ تھانوی نے خطاب کرتے ہوئے کہا کہ چالیس احادیث کو یاد کرنے والا قیامت کے دن علماء کے ساتھ اٹھایا جائے گا آپ نے تو ماشاء اللہ 200احادیث زبانی یاد کی ہیں ،
انہوں نے کامیاب طالبات کو مبارکباد دیتے ہوئے معہد عائشہ الصدیقہ قاسم العلوم للبنات دیوبند کے تعلیمی وتربیتی نظام کی ستائش کی ۔دریں اثنا مسابقہ کی کنوینر ضویا حنیف نے رپورٹ پیش کرتے ہوئے کہا کہ مسابقہ حفظ الحدیث میں 116طالبات نے شرکت کی اور مختلف مراحل سے ہوتے ہوئے آج کے آخری مرحلے تک 10طالبات موجودرہیں ۔اس موقع پر بیسٹ اسٹوڈنٹ ،اسٹار اسٹوڈنٹ ایوارڈ کے علاوہ تقریر ،نعت ،عربی تقریر اور انگلش تقریر میں پوزیشن لانے والی طالبات کو بھی انعامات سے نوازا گیا ۔پروگرام کا اختتام مفتی محمد معراج قاسمی کی دعا پر ہوا ۔پروگرام میں معہد کا تمام اسٹاف موجود رہا ۔
