لکھنؤ12مئی (ہندوستان اردو ٹائمز) اتر پردیش کے تمام مدارس میں جمعرات سے روزانہ قومی ترانہ گانا لازمی کر دیا گیا ہے۔ اتر پردیش مدرسہ ایجوکیشن بورڈ کے رجسٹرار ایس این پانڈے نے 9 مئی کو تمام ضلع اقلیتی بہبود کے افسران کو اس سلسلے میں ایک حکم جاری کیا ہے۔ پانڈے نے حکم نامے میں کہا ہے کہ 24 مارچ کو ہونے والی بورڈمیٹنگ میں لیے گئے فیصلے کے مطابق نئے تعلیمی سیشن سے تمام مدارس میںقومی ترانہ کو لازمی قرار دیا گیا ہے۔
پانڈے نے کہاہے کہ رمضان کے مہینے میں 30 مارچ سے 11 مئی تک مدارس میں تعطیل کا اعلان کیا گیا تھا اور 12 مئی سے باقاعدہ کلاسز شروع ہو گئی تھیں، اس لیے یہ حکم آج سے نافذ ہو گیا ہے۔ حکم نامے میں کہا گیا ہے کہ ریاست کے تمام تسلیم شدہ امداد یافتہ اور غیر امداد یافتہ مدارس میں آئندہ تعلیمی سیشن سے کلاسز کے آغاز سے قبل اساتذہ اور طلبہ کو دیگر چیزوں کے ساتھ قومی ترانہ لازمی طور پر پڑھنا ہوگا۔
اس حکم کی تعمیل کو یقینی بنانے کے لیے ضلع اقلیتی بہبود کے افسران کو باقاعدگی سے نگرانی کرنی ہوگی۔اساتذہ یونین مدارس عربیہ کے جنرل سیکرٹری دیوان صاحب زمان خان نے بتایاہے کہ اب تک مدارس میں عام طور پر کلاسز شروع ہونے سے پہلے حمد اور سلام پڑھا جاتا تھا۔ بعض مقامات پر قومی ترانہ بھی گایا گیا لیکن یہ لازمی نہیں تھا۔ لیکن اب اسے لازمی قرار دے دیا گیا ہے۔اس وقت اتر پردیش میں کل 16461 مدارس ہیں جن میں سے 560 کو حکومت سے گرانٹ ملتی ہے۔
