نئی دہلی 29مارچ (ہندوستان اردو ٹائمز) انتخابی پالیسی سازپرشانت کشور نے پیش گوئی کی ہے کہ عام آدمی پارٹی کو قومی پارٹی بننے میں 15 سے 20 سال لگیں گے۔ انہوں نے کہاہے کہ کسی بھی پارٹی کو قومی پارٹی بننے کے لیے 20 کروڑ ووٹ حاصل کرنے کی ضرورت ہے، وہیں عام آدمی پارٹی کو 2019 میں 27 لاکھ ووٹ ملے۔انہوں نے کہاہے کہ اب تک ملک میں صرف کانگریس اور بی جے پی ہی قومی پارٹیوں کے طور پر ابھری ہیں۔
انہوں نے کہاہے کہ ملک میں کئی جماعتیں آزما چکی ہیں، لیکن وہ ابھرنے میں کامیاب نہیں ہو سکیں۔ اس کا مطلب یہ نہیں کہ کوئی دوسری جماعت قومی جماعت نہیں بن سکتی لیکن یہ راتوں رات نہیں ہو سکتا اور یہ وقت کی ضرورت ہے۔پرشانت کشور نے کہاہے کہ نظریاتی طور پر کوئی بھی پارٹی قومی پارٹی بن سکتی ہے، لیکن اگر آپ تاریخ پر نظر ڈالیں تو پتہ چلتا ہے کہ پورے ہندوستان میں صرف بی جے پی اور کانگریس ہی پہنچ پائی ہیں۔
اس کا مطلب یہ نہیں کہ کوئی اور پارٹی ایسا نہیں کر سکتی ہے۔ لیکن اس کے لیے 15 سے 20 سال تک مسلسل جدوجہد کرنی ہوگی۔ ایسی تبدیلی راتوں رات نہیں آ سکتی۔ پرشانت کشور نے یہ بات اس وقت کہی ہے جب ان سے پنجاب اسمبلی انتخابات میں عام آدمی پارٹی کی کلین سویپ کے بارے میں سوال پوچھا گیا۔ پی ایم نریندر مودی کی مقبولیت کے بارے میں پرشانت کشورنے کہاہے کہ آج بھی ان کے حامی کھڑے ہیں۔
