ذکر اللہ کی کثرت سے جنت کے درجات بلند ہوتے رہتے ہیں ، مولانا شاہ قمرالزماں الٰہ آبادی کا رائے پور رحیمی خانقاہ میں مجلس سے خطاب
دیوبند، 28؍ ستمبر (رضوان سلمانی) معروف و ممتاز عالم دین، عظیم فقیہ اور قلمکار مولانا شاہ قمرالزماں الٰہ آبادی رائے پور رحیمی خانقاہ مع قافلہ کے تشریف لائے، یہاں پر خانقاہ کے سربراہ شاہ عتیق احمد نے استقبال کیا۔اس دوران ایک روحانی مجلس کا انعقاد کیا گیا، جس کا آغاز قاری حنیف کی تلاوت سے ہوا اور نظامت قاری راشد نے کی ۔
مولانا شاہ قمر الزماں الٰہ آبادی نے علماء، عوام اور روزانہ آنے والے مہمانوں و زائرین خانقاہ کو ناصحانہ خطاب کیا،اور ذکر کی اہمیت،عظمت اور رفعت کو بیان کرتے ہوئے کہا کہ ذکر اللہ کی کثرت سے جنت کے درجات بلند ہوتے رہتے ہیں، لہٰذا ذکر الٰہی کو اپنا شیوہ بنایا جائے،دعائیں سیکھنے سکھانے کا بھر پور اہتمام کیا جائے، بزرگوں سے تعلق استوار کیا جائے، ان کی مجالس کو غنیمت سمجھا جائے، ان کے ہاتھ میں اپنا ہاتھ دیا جائے، دل کی دنیا آباد کی جائے، روحانیت و ایمانیت کی شمع فروزاں کی جائے۔ جو اس حقیقت کو پالے گا، اُسے ایمان کی حلاوت و مٹھاس نصیب ہوگی اور نا امیدی و مایوسی کا طوفان خس و خاشاک دکھائی دے گا۔
بعد ازاں انہوں نے خانقاہ کے حوالے سے گفتگو کرتے ہوئے کہا کہ خانقاہ رحیمی ایک ایسی خانقاہ ہے جس نے تصوف کے تمام اصولوں، ضابطوں، روشن حکایتوں اور تعلیمات کو اپنی اصل شکل میں نہ صرف برقرار رکھا ہے، اللہ تعالیٰ اس کی حفاظت فرمائے۔ اس کے بعد مولانا نے ملک میں امن و امان اور امت کی خوشحالی و کامرانی کے لئے دعا کرائی۔ بعد ازاں مولانا مدرسہ فیض ہدایت رائے پور اور مولانا سید مکرم حسین قدس سرہ کی تعزیت کے لئے سنسار پور تشریف لے گئے۔ واپسی میں مولانا ڈاکٹر عبدالمالک مغیثی کو مولانا کی میزبانی کا شرف حاصل ہوا اور انہوں نے جامعہ رحمت گھگھرولی کے اساتذہ و طلباء کے ساتھ بڑی گرم جوشی کے ساتھ مولانا کا مع قافلہ کے استقبال کیا۔
جامعہ میں مولانا شاہ قمرالزماں الٰہ آبادی نے عاشق ملت مولانا حکیم محمد عبداللہ مغیثی سے اپنے دیرینہ تعلقات اور محبت کا اظہار کیا اور اجتماعی دعاء کراتے ہوئے مولانا حکیم محمد عبداللہ مغیثی کے لیے خصوصی طور پر دعاء صحت کرائی۔ مولانا ڈاکٹر عبدالمالک مغیثی نے خوشی و مسرت کا اظہار کرتے ہوئے تمام مہمانوں بالخصوص مولانا کا شکریہ ادا کیا اور کہا کہ آپ تشریف لائے یہ آپکی ہمارے تئیں محبت ہی ہے۔ اللہ تعالی مولانا کی عمر میں برکت عطا فرمائے اور اسی طرح آپ ہمیں اپنی شفقتوں و عنایتوں سے نوازتے رہیں۔ بعد ازیں خانقاہ پٹھیڑ میں مولانا موصوف کا استقبال خانقاہ کے سربراہ صوفی معین الدین نے کیا، علامہ صاحب نے وہاں دعاء کرائی۔
قافلہ میں مولانا محبوب قمرالزماں، مولانا عبداللہ قمرالزماں، مولانا احمد سعیدی،مولانا ظہور احمد قاسمی، مفتی راشد ندوی،مفتی ناصرالدین مظاہری، مولانا شوکت نقشبندی، قاری مرغوب الرحمن، مفتی سخاوت قمر،مولانا یعقوب بلند شہری،مولانا احسان محسن، قاری سعید الظفر،عبداللہ اطہر صدیقی،مولانا مختارالحسن، مولانا سراج،مولانا عبدالخالق مغیثی، مولانا صادق مظاہری، قاری جنید، قاری افتخار، قاری ناصر،مولانا دلشاد، قاری عاطف، مولانا عارف، مفتی عمیر مظاہری رشید سمیت علماء و ذمہ دارانِ مدارس ہمراہ رہے۔
