نئی دہلی، 13جون ( ہندوستان اردو ٹائمز) دہلی اور منطقہ قومی دارالحکومت کے مختلف حصوں میں پیر کے روز گرمی کی لہر جاری رہی اور شدید گرمی کے درمیان زیادہ سے زیادہ درجہ حرارت 43 ڈگری سیلسیس کے آس پاس ریکارڈکیا گیا ہے۔ محکمہ موسمیات نے اس کی اطلاع دی۔تاہم محکمہ موسمیات نے دارالحکومت دہلی میں دن کے وقت ہلکی بارش اور عام طور پر مطلع ابر آلود رہنے کا اشارہ بھی دیا تھا۔
محکمہ موسمیات نے بلیٹن میں بتایا کہ ہماچل پردیش، راجستھان، ہریانہ، مشرقی اتر پردیش کے کچھ علاقوں میں گرمی کی لہر جاری رہے گی۔ دارالحکومت میں لوجیسی صورتحال 15 جون تک برقرار رہے گی۔محکمہ موسمیات کے مطابق صبح 8:30 بجے کم سے کم درجہ حرارت 31.6 ڈگری سیلسیس ریکارڈ کیا گیا جو معمول سے چار ڈگری زیادہ تھا جبکہ ہوا میں نمی کا تناسب 42 فیصد ریکارڈ کیا گیا۔
محکمہ کی ہفتہ وار پیشین گوئی کے مطابق جمعرات سے اتوار تک گرج چمک کے ساتھ بارش کی پیش گوئی کی گئی ہے اور بدھ اور اتوار کے درمیان زیادہ سے زیادہ درجہ حرارت 42 ڈگری سیلسیس سے گر کر 36 ڈگری سیلسیس تک آسکتا ہے۔دہلی کی صفدرجنگ آبزرویٹری میں اتوار کو زیادہ سے زیادہ درجہ حرارت 43.9 ڈگری سیلسیس ریکارڈ کیا گیا، جو معمول سے چار ڈگری زیادہ ہے۔
