حاملہ خاتون رکن پارلیمنٹ کے پیٹ پر ایوان کے اندر لات مارنے والے 2 اراکین پارلیمنٹ کو 6 ماہ جیل کی سزا
سنیگال میں گزشتہ دنوں پارلیمنٹ کے اندر ایک ایسا حیرت انگیز معاملہ سامنے آیا تھا جس نے صرف سنیگالی عوام کو ہی نہیں بلکہ پوری دنیا کو حیران کر کے رکھ دیا تھا۔ معاملہ کچھ یوں تھا کہ دو مرد اراکین پارلیمنٹ نے حاملہ خاتون رکن پارلیمنٹ ایمی ندیے پر ایوان میں ہی حملہ کر دیا تھا جس کے لیے ان دونوں کو 6 ماہ جیل کی سزا سنائی گئی ہے۔
دراصل پارلیمنٹ میں بجٹ اجلاس کے دوران مرد اراکین پارلیمنٹ نے ایک حزب مخالف مذہبی شخص کی تنقید کرنے پر ایمی ندیے کے پیٹ پر لات چلا کر حملہ کیا تھا۔ اس معاملے میں وہاں کے جج نے رکن پارلیمنٹ ممادو نیانگ اور مسّاتا سانب کو معاوضے کے طور پر خاتون رکن پارلیمنٹ ندیے کو 5 ملین سی ایف اے فرینک ادا کرنے کا بھی حکم دیا ہے۔
Senegal: Two opposition members were sentenced to six months in prison after attacking a pregnant member of parliament. #عاجل#داكار#السنغال#فهد_الجبيري#أن_تعرف_أكثر#الجزيرة_لن_تبلغ_عن_هذا#الجمعية_الوطنية_السنغاليةpic.twitter.com/Cxfo9sYgar
— Vagabond #JusticeForMalkiRoth (@vagabond2022) January 2, 2023
اس واقعہ کی ویڈیو سوشل میڈیا پر وائرل ہو گئی تھی جس میں دیکھا گیا تھا کہ رکن پارلیمنٹ مسّاتا سانب یکم دسمبر کو بجٹ پر بحث کے دوران ندیے کی طرف بڑھ رہے ہیں اور انھیں تھپڑ مارتے ہوئے دکھائی دے رہے ہیں۔ پھر ندیے ایک کرسی پھینک کر جوابی کارروائی کرتی ہیں، لیکن اسی وقت ایک دیگر مرد رکن پارلیمنٹ نے ندیے کے پیٹ پر لات مار دی۔ پھر ایک دیگر رکن پارلیمنٹ نے درمیان میں آ کر انھیں بچایا۔ اس واقعہ کی عالمی سطح پر شدید مذمت کی گئی اور ساتھ ہی پوری دنیا میں خواتین کے حقوق کو لے کر ایک الگ بحث شروع ہو گئی۔
تازہ ترین اطلاعات کے مطابق حاملہ خاتون رکن پارلیمنٹ ندیے کی طبیعت ہنوز خراب ہے۔ وہ اسپتال سے باہر آ چکی ہیں لیکن ان کی حالت نازک بتائی جا رہی ہے۔ بتایا جاتا ہے کہ برسراقتدار بینو بوک یاکار اتحاد کی رکن ندیے حملے کے بعد ایوان میں ہی بیہوش ہو گئی تھیں۔ انھیں اپنے بچے کی ہلاکت کا خدشہ بھی تھا۔ نیوز ایجنسی اے ایف پی کے مطابق ان کے وکیل بابو کر سیسے کا کہنا ہے کہ اسپتال سے ندیے کو چھٹی ضرور مل گئی ہے، لیکن اس کے باوجود وہ بے حد مشکل حالات کا سامنا کر رہی ہیں۔
