جمعیۃ علماء ضلع مظفرنگر کے ذمہ داران کی میٹنگ کا انعقاد
مولانا سید ارشد مدنی نے پورے ملک میں سماجی اصلاحی پروگراموں کو مضبوطی سے نافذ کیا ہے : عزیز الرحمن
دیوبند، 27؍ دسمبر (رضوان سلمانی) جمعیۃ علماء ضلع مظفر نگر کے ذمہ داران اور ضلع بھر کی مقامی اکائیوں کے ذمہ داران کا ایک خصوصی اجلاس ضلعی نائب صدر حاجی عزیز الرحمن کی صدارت اور ضلعی جنرل سیکرٹری مولانا مکرم علی قاسمی کی نظامت میں منعقد ہوا ،جس میں اغراض و مقاصد پر روشنی ڈالتے ہوئے مولانا مکرم قاسمی نے کہا کہ جمعیۃ علماء ہند اصلاح معاشرہ کے پروگرام کو مضبوطی سے چلانے کے لیے سخت محنت کر رہی ہے اور اصلاح معاشرہ وقت کا اہم تقاضہ ہے۔ اجلاس میں ضلع کی 6 رکنی کمیٹی تشکیل دی گئی۔ اصلاح معاشرہ کمیٹی کو گاؤں گاؤں اصلاح معاشرہ کمیٹیاں بنانے کا کام سونپا گیا۔
مہمان خصوصی مولانا نذر محمد قاسمی نے کہا کہ جمعیۃ علمائے ہند کی شاندار تاریخ ہے، یہ معاشرے کے مفاد میں کام کرتی ہے اور اصلاح معاشرہ میں خصوصی کردار ادا کرتی ہے۔صدارت کر رہے حاجی عزیز الرحمن نے کہا کہ ہمارا تعلق اللہ سے ہے۔ اور ہمارا ہر قدم اللہ کی رضا کے لئے ہونا چاہیے۔ انہوں نے کہا کہ جمعیۃ علماء ہند کے قومی صدر مولانا سید ارشد مدنی نے پورے ملک میں سماجی اصلاحی پروگراموں کو مضبوطی سے نافذ کیا ہے جو کہ معاشرے کی فلاح و بہبود کے لیے بہت ضروری ہے۔ہمارے معاشرے میں پھیلی ہوئی بیماریوں کے خاتمے کے لیے ہم اس نظام کو چلائیں گے۔ مختلف مقامات کا دورہ کریں گے۔
بڈھانہ شہر کے صدر حافظ شیردین نے اجلاس سے خطاب کرتے ہوئے کہا کہ ہم سب کو مل کر سماجی اصلاح کے لیے کام کرنا ہوگا اور تمام کارکنان کو اصلاح معاشرہ کے تعلق سے محنتیں کرنی ہیں ہمارا کام محنت کرنا ہے ہدایت اللہ کے ہاتھ میں ہے۔ پروگرام کا آغاز قاری اسرار رشیدی کی تلاوت و نعت رسول سے ہوا ،مفتی عثمان کی دعا پر اجلاس کا اختتام ہوا۔اس موقع پر مولانا نذر محمد،حافظ شیر دین، مولانا زبیر رحمانی، مولانا محمد صادق، مولانا مدثر، مفتی محمد عثمان، مفتی عبدالقادر قاسمی،محمد آصف قریشی بڈھانوی میڈیا سیکریٹری، مولانا اسرائیل،مولانا سعد،حافظ تحسین،مولانا رضوان، مولانا شان محمد،مولانا عمران،مولانا ہارون،مولانا ابوالکلام،مفتی مجیب الرحمٰن،مولانا جاوید، مفتی عین الدین،مفتی نوید،کلیم تیاگی، قاری اسرار رشیدی، محمد اکرام،محمد عقیل وغیرہ موجود رہے
