نئی دہلی ،7جنوری (ہندوستان اردو ٹائمز) پٹیالہ ہاؤس کورٹ نے ہفتے کے روز شنکر مشرا کو 14 دن کی عدالتی تحویل میں بھیج دیا، جس پر الزام ہے کہ انہوں نے گزشتہ سال نومبر میں نیویارک-نئی دہلی کی پرواز میں نشے کی حالت میں ایک معمرخاتون مسافر پر پیشاب کردیا تھا۔یہ حکم تفتیشی افسر (آئی او) کے عدالت میں پیش کیے جانے کے بعد آیا کہ مشرا جانچ میں تعاون نہیں کر رہے تھے۔
پولیس نے مشرا کے تین دن کے ریمانڈ کے لیے عدالت سے رجوع کیا تھا۔ تاہم عدالت نے ملزم کو 14 روزہ جوڈیشل ریمانڈ پر جیل بھیج دیا۔عدالت نے یہ بھی نوٹ کیا کہ پہلی نظر سے ایسا لگتا ہے کہ ملزم جان بوجھ کر تفتیش میں شامل ہونے سے گریز کر رہا تھا۔ اپنے حکم میں عدالت نے یہ بھی کہا کہ دوسرے گواہوں کی جانچ کے لیے ملزم کی جسمانی موجودگی ضروری نہیں ہے اور اسے پولیس کی تحویل میں لیے بغیر سیکشن 164 سی آر پی سی کے تحت بیانات ریکارڈ کیے جا سکتے ہیں۔
دہلی پولیس نے جمعہ کو ایئر انڈیا کی فلائٹ نمبر 201 کے پائلٹوں اور عملے کے ارکان کو تحقیقات میں شامل ہونے اور اپنے بیانات ریکارڈ کرنے کے لیے طلب کیا۔سیکشن 510 (عوام سے بدتمیزی کرنا)، 509 (عورت کے ساتھ نازیباسلوک)، 294 (عوامی مقام پر فحش گانا گانا)کے تحت شنکرمشرا پر آئی جی آئی ایئرپورٹ پولیس اسٹیشن میں درج ایک کیس میں تعزیرات ہند کے ساتھ ساتھ ایئر کرافٹ رولز ایکٹ کی ایک دفعہ لگائی گئی ہے۔
