امپھال ، 21دسمبر ( ہندوستان اردو ٹائمز) منی پور کے نونی ضلع میں بدھ کے روز تھمبالانو ہائر سیکنڈری اسکول کی بس الٹنے سے 7 طلباء ہلاک اور 40 دیگر زخمی ہوگئے۔ حادثہ ریاستی دارالحکومت امپھال سے تقریباً 55 کلومیٹر دور پہاڑی ضلع کے لونگسائی علاقے کے قریب اولڈ کچار روڈ پر پیش آیا۔
اسکول کے طلباء دو بسوں میں نونی ضلع کے کھوپم کے سالانہ اسکول کے مطالعاتی دورے پر گئے۔پولیس کا کہنا ہے کہ طلبہ جس بس میں سفر کر رہے تھیں،اس کا ڈرائیور کنٹرول کھو بیٹھا جس کی وجہ سے بس الٹ گئی۔ پولیس کو جیسے ہی حادثے کی اطلاع ملی، انہوں نے فوری طور پر موقع پر مدد کے انتظامات شروع کر دیئے۔ حکام نے بتایا کہ زخمی طالبات کو علاج کے لیے دارالحکومت امپھال لے جایا جا رہا ہے۔
منی پور کے وزیر اعلیٰ نے ٹوئٹر پر بس حادثے کی ویڈیو شیئر کرتے ہوئے لکھاکہ آج اولڈ کچار روڈ پر اسکولی بچوں کو لے جانے والی بس کے حادثے کے بارے میں سن کر بہت دکھ ہوا۔ ایس ڈی آر ایف، میڈیکل ٹیم اور مقامی ایم ایل اے ریسکیو آپریشن کے انتظامات کے لیے موقع پر پہنچ گئے۔ میں بس میں سوار سبھی کی حفاظت کے لیے دعا گو ہوں۔وزیراعلیٰ بیرن سنگھ نے ہلاک ہونے والے طلبہ کے لواحقین کو پانچ پانچ لاکھ روپے کے معاوضے کا اعلان کیا ہے۔
وہیں پیر کے روزآسام کے وزیر اعلیٰ ہمانتا بسوا سرما نے ضلعی انتظامیہ کے اہلکاروں کو ہدایت کی کہ وہ اس بات کو یقینی بنائیں کہ آنے والے سال میں حادثات میں کم از کم 20 فیصد تک کمی لانے کے لیے سڑک کی حفاظت کے اقدامات کیے جائیں۔ پیر کوانہوں نے روڈ سیفٹی کو نافذ کرنے کے لیے اٹھائے گئے اقدامات اور ریاستی حکومت کے فلیگ شپ پروگرام اورونودوئی کی حیثیت کا جائزہ لیاہے۔
